सिन्धुपाल्चोकको हेलम्बुमा ‘ निःशुल्क आयुर्वेद स्वास्थ्य शिविर ’ हुँदै

समर रानाभाट

२ महिना अघि

पाठक संख्या १०७

सिन्धुपाल्चोक । सिन्धुपाल्चोकको हेलम्बु गाउँपालिकामा ‘ आराम, आनन्द र आरोग्य ’ भन्ने नाराका साथ ‘ निःशुल्क आयुर्वेद स्वास्थ्य शिविर ’ हुने भएको छ । हेलम्बु गाउँपालिकाको सहयोग तथा मदन भण्डारी मेमोरियल कलेज, धन्वन्तरी आयुर्विज्ञान संस्थान र अन्नपूर्ण टाइम्सको संयुक्त आयोजनामा फागुन ३ गते स्वास्थ्य शिविर हुन लागेको हो । सिन्धुपाल्चोकको हेलम्बु गाउँपालिका -७, महाङ्कालस्थित स्वास्थ्य चौकीमा हुने शिविरका लागि राजधानी काठमाडौंबाट १० जना बीएएमए, १ जना विशेषज्ञ चिकित्सक र १ जना फिजियोथेरापिस्ट जाने कार्यक्रम संयोजक डा. सुष्मा साउदले जानकारी दिइन् । 

शिविरमा सामान्य स्वास्थ्य जाँचदेखि विभिन्न रोग ( जस्तै: हाडजोर्नी, नशा, पेटसम्बन्धी समस्या, ग्यास्ट्रिक, पायल्स, फिसर, फिस्टुला, महिनावारी गडबडी ) सहित विभिन्न रोगको परीक्षण तथा परामर्श प्रदान गरिने साउदले बताइन् । ‘जटिल किसिमका रोगका लागि अस्पताल तथा उपचार विधिबारे परामर्श प्रदान गरिने छ’, साउदले भनिन्,‘स्वास्थ्य शिविरबाट उपलब्ध गराइने सम्पूर्ण सेवा तथा औषधिहरू नि:शुल्क हुने छन् ।’ खानपान, जीवनशैली, योग र आरोग्यबारे जनचेतनामूलक सन्देशहरू पनि प्रवाह गरिने डा. साउदले बताइन् । साउदका अनुसार १ दिने शिविरमा ५ सय जनालाई सेवा दिने लक्ष्य राखिएको छ । शिविरबाट लाभान्वित हुन हेलम्बु गाउँपालिकाले प्रत्येक वडाका बासिन्दालाई सूचित गराइरहेको जनाएको छ ।