बागमती प्रदेश सहकारी संघ लिमिटेडको आयोजनामा ‘ प्रथम बागमती प्रदेश सहकारी सम्मेलन ’ हुने

समर रानाभाट

२ महिना अघि

पाठक संख्या १७२

काठमाडौं । बागमती प्रदेश सहकारी संघ लिमिटेडको आयोजनामा ‘ प्रथम बागमती प्रदेश सहकारी सम्मेलन ’ चैत ८ र ९ गते ललितपुरमा हुने भएको छ । उक्त सम्मेलनमा प्रदेशका १३ वटै जिल्लाका सहकारीकर्मीहरुको सहभागीता गराइने भएको हो । सहकारीको संख्या सँगै समस्या पनि धेरै भएको प्रदेश भएकोले सबै सरोकारवालाहरुलाई एकै ठाउँमा राखेर समाधानका उपाए खोज्न सम्मेलन आयोजना गर्न लागिएको संघका अध्यक्ष रामशरण शर्मा घिमिरेले बताए । घिमिरेले बागमती प्रदेश सहकारी संघले आयोजना गर्ने यो कार्यक्रम हालसम्मको ठूलो र महत्वपूर्ण कार्यक्रम हुने बताए । प्रत्येक ४ / ४ वर्षमा आयोजना गरी बागमती प्रदेशको सहकारी अभियानलाई गति दिने, मार्गदर्शन गर्ने र अभियानमा भएका त्रुटीहरुलाई सुधार गर्ने योजना रहको अध्यक्ष घिमिरेको भनाइ छ । ‘प्रादेशिक अभिभावक संघको रुपमा रहेर सहकारीका असल अभ्यासहरुको जानकारी गराएर सरकार र आम मानिसहरुको सहकारीप्रतिको बुझाईलाई सकारात्मक रुपमा ग्रहण गर्न सक्ने वातावरणको निर्माण गर्न सम्मेलन आयोजना गरिएको हो, सम्मेलनले पक्कै पनि महत्वपूर्ण भूमिका खेल्ने छ’, घिमिरेले भने । सम्मेलनबाट सहकारीका वर्तमान समस्या समाधानका विषयमा साझा धारणा निर्माण गर्ने संघ, प्रदेश र स्थानीय तीनै तहका सरकार र अभियानको बीचमा सहकार्यको मार्गदर्शन निर्माण हुने, सहकारी मार्फत् उत्पादनका क्षेत्रहरुको पहिचान र परिचालनमा जोड पुग्ने, बागमती प्रदेशको सहकारी अभियानको मार्गचित्र निर्माण हुने अपेक्षा गरिएको घिमिरेले बताए । 

सम्मेलनमा सहभागिताका लागि संघले रजिष्ट्रेशन शुल्क ४ हजार मात्र तोकेको छ । संघका सदस्य संघ संस्थाका प्रतिनिधिहरुका लागि ४ हजार तथा संघका सदस्य नरहेका सहभागिहरुका लागि ५ हजार शूल्क तय गरेको संघका व्यवस्थापक रुपक घिमिरेले बताए । उक्त सम्मेलनमा स्थानीय तहका सहकारी हेर्ने प्रमुखहरुलाई पनि सहभागी गराइने भएकोले र संघका सदस्य नभएका सहकारीकर्मीहरुले पनि सहभागिता जनाउन सकिने भएकोले २ थरी शूल्क तय गरिएको घिमिरेले जनाए । ‘दुई दिनको कार्यक्रम भएकोले सहकागिता शूल्क न्यून नै हो, हामीले सम्मेलनबाट नाफा कमाउने भन्दा पनि धेरै भन्दा धेरैको सहभागिता गराएर कार्यक्रम उपलब्धीमूलक बनाएर सम्पन्न गर्न खोजेका छौँ, त्यसैले शूल्क कम नै राखेका छौँ’, घिमिरेले भने । उक्त सम्मेलनमा प्रदेशका सबै स्थानीयतहका प्रतिनिधिहरुलाई समेत सहभागी गराएर सहकारीको महत्व र योगदान बुझाउन संघले यो प्रदेशस्तरिय सम्मेलन आयोजना गरेको व्यवस्थापक घिमिरेको भनाइ छ । २ दिनको सम्मेलनमा विषय विज्ञहरुबाट कार्यपत्र प्रस्तुत हुने र ब्यापक छलफल गरी सहकारीको आगामी बाटो तय गरिने घिमिरेले बताए । 

प्रदेशका १३ वटा जिल्लाबाट कोटा प्रणालीमार्फत सहभागिता गराइने र बागमती प्रदेशका सबै स्थानीय तहहरुबाट सहकारी हेर्ने अधिकारीहरुलाई पनि सहभागिता गराइने घिमिरेले बताए । बढीमा ६ सय जना मात्र सहभागि गराइने सम्मेलन संघले प्रथम सहकारी सम्मेलनलाई सहकारीको लागि उपलब्धीमूलक बनाइने घिमिरेले बताए । संघले सहभागिताको रजिष्ट्रेशनका लागि खल्ती एपसँग सम्झौता पनि गरिसकेको छ । सहभागीहरुको रजिष्ट्रेशन खल्ती एप्लिकेशनबाट गराउने सहमति भएको घिमिरेले बताए । संघका अध्यक्ष रामशरण शर्मा घिमिरे र खल्ती एप्लिकेशनक व्यवसाय साझेदार वसन्त दाहालले उक्त सम्झौतामा हस्ताक्षर गरेका छन् । कार्यक्रमलाई बागमती प्रदेश सहकारी तथा गरिवी निवारण मन्त्रालयको पनि सहकार्य रहने जनाइएको छ ।