कावासोती १३ मा दस दिने डिजिटल उद्यमशीलता तालिम सुरु

समर रानाभाट

४ हप्ता अघि

पाठक संख्या १८४

तिर्थराज काफ्ले कावासाेती — 
प्रगतिशील युवा क्लब र कावासोती नगरपालिका वडा नं. १३ को समन्वयमा १० दिने डिजिटल उद्यमशीलता तालिम सुरु भएको छ। क्लबका अध्यक्ष समिर लामिछानेको अध्यक्षतामा तथा वडा नं. १३ का कार्यवाहक वडा अध्यक्ष दुर्गा माया चौधरीको प्रमुख आतिथ्यतामा कार्यक्रम भव्य रूपमा उद्घाटन गरिएको हो।

कार्यक्रमलाई सम्बोधन गर्दै प्रमुख अतिथि चौधरीले प्रविधिमैत्री समाज निर्माणका लागि यस्ता तालिम महत्त्वपूर्ण रहने बताइन्। उनले युवा वर्गलाई उद्यमशीलतामा प्रेरित गर्न यस्ता कार्यक्रम प्रभावकारी हुने भन्दै आगामी दिनमा वडा कार्यालयको कार्ययोजनामा समेट्ने प्रतिबद्धता जनाइन्।।

तालिम ओरेकल एडुकेसन इन्स्टिट्युटका कम्प्युटर प्रशिक्षक अनिश पौडेलकाे सहजिकरण रहने छ। उनले युवा वर्ग र प्रविधिबीच अन्योन्याश्रित सम्बन्ध रहेको उल्लेख गर्दै प्रविधिको सही उपयोगले युवाहरूलाई आत्मनिर्भर बनाउन सकिने बताए। डिजिटल उद्यमशीलता अहिलेको आवश्यकता भएकाले यस्तो तालिमले सहभागीहरूलाई नयाँ सीप दिलाउने उनको भनाइ छ।

तालिममा डिजिटल उद्यमशीलताको आधारभूत ज्ञान, प्रविधिको उपयोग, अनलाइन व्यवसाय प्रवर्द्धन तथा डिजिटल मार्केटिङका विषयमा प्रशिक्षण दिइने आयोजकले जानकारी दिएको छ। स्थानीय युवा, विद्यार्थी उपस्थित रहेकाे  तालिम १० दिनसम्म सञ्चालन हुनेछ।