लोकतन्त्रको रक्षा र मानव अधिकार संरक्षणका लागि नागरिक समाजले शान्तिपूर्ण धर्ना गर्ने

समर रानाभाट

६ दिन अघि

पाठक संख्या १८

लोकतन्त्रको रक्षा, मानव अधिकारको संरक्षण र समाजमा शान्ति स्थापनाका लागि गैरसरकारी संस्था महासंघ नेपाल को संयोजनमा नागरिक समाजद्वारा शान्तिपूर्ण धर्ना आयोजना गरिने भएको छ।

देशमा प्राप्त लोकतान्त्रिक उपलब्धिहरूको रक्षा, विधिको शासनको प्रवर्द्धन तथा मानव अधिकारको सुनिश्चितताका लागि २०७८ चैत्र १७ गते, आइतबार बिहान ७ः३० बजे माइतीघर मण्डलामा धर्ना आयोजना गरिन लागेको महासंघले जनाएको छ।

महासंघका अध्यक्ष अर्जुन भट्टराईद्वारा जारी अपिलमा नागरिक समाजका सम्पूर्ण सदस्य, मानव अधिकारकर्मी, सामाजिक अभियन्ता तथा सरोकारवालालाई यस शान्तिपूर्ण धर्नामा सहभागी भई ऐक्यबद्धता जनाउन अनुरोध गरिएको छ। अपिलमा भनिएको छ, लोकतन्त्रको रक्षा र मानव अधिकारको संरक्षण गर्नु हामी सबै नागरिकको कर्तव्य हो। लोकतान्त्रिक प्रणालीमाथि भइरहेका चुनौतीहरूलाई ध्यानमा राख्दै देशभरका नागरिक संघसंस्थाहरूले खबरदारी गर्नु आवश्यक छ।

शान्ति, स्थायित्व र लोकतान्त्रिक मूल्य–मान्यता मजबुत बनाउन सातै प्रदेशका नागरिक समाज तथा संस्थाहरूलाई पनि खबरदारी अभियानमा जोडिन आग्रह गरिएको छ। लोकतान्त्रिक उपलब्धिहरूलाई संस्थागत गर्दै नागरिक अधिकारको सुनिश्चितता गर्ने लक्ष्यका साथ आयोजना गरिएको धर्नाले नागरिक चेतनाको आवाज बुलन्द बनाउने अपेक्षा गरिएको छ।

महासंघले सबैलाई धर्नामा सहभागी भई लोकतन्त्रको संरक्षण तथा समाजमा स्थायित्व र शान्ति स्थापनाका लागि योगदान दिन आह्वान गरेको छ।