भिमाद बजारमा वैशाख १ गते मेखे संक्रान्ति मेला लाग्ने

समर रानाभाट

३ दिन अघि

पाठक संख्या ६४

चैत्र १९ , भिमाद 
अमृत परियार 
 नयाँ वर्ष २०८२ को अवसरमा युवा क्लब भिमादले भिमाद बजारमा ऐतिहासिक "भिमाद मेखे संक्रान्ति मेला २०८२" आयोजना गर्ने भएको छ।

बैशाख १ गते नयाँ वर्षलाई स्वागत गर्दै स्थानीय कला, संस्कृति, व्यापार, पर्यटन तथा परम्परागत खेलकुदको प्रवर्द्धन गर्ने उद्देश्यसहित भिमाद नगरपालिकाको संरक्षकत्व र युवा क्लब भिमादको आयोजनामा मेलाको आयोजना गर्न लागिएको क्लबका अध्यक्ष ज्ञानबहादुर थापाले बताएका छन्। भिमाद बजारमा नयाँ वर्षको अवसरमा विगतका वर्षहरूमा मेखे संक्रान्ति मेला लाग्ने गरे पनि पछिल्लो समय उक्त मेला लोप हुँदै गएकाले यसको संरक्षणका लागि क्लबले मेलाको आयोजना गर्न लागेको उनले बताए।

मेलाको मुख्य आकर्षणका रूपमा पारम्परिक भेषभूषा, मौलिक कौराहा, भजन चुड्का, नौमती बाजा, सांस्कृतिक नृत्य, हस्तकला, कृषि सामग्री प्रदर्शनी, स्थानीय परिकार, परम्परागत खेल (छेलो हान्ने) प्रतियोगिता रहेको युवा क्लब भिमादका उपाध्यक्ष एवम् कार्यक्रम संयोजक ईश्वर न्यौपानेले बताएका छन्। छेलो हान्ने खेलमा प्रथम पुरस्कार ५ हजार रुपैयाँ रहेको छ भने दर्ता शुल्क नलाग्ने न्यौपानेले जानकारी दिए।

कार्यक्रम संयोजकका अनुसार मेलाले भिमाद नगरपालिकाको ऐतिहासिक एवं सांस्कृतिक पहिचान जोगाउनुका साथै स्थानीय व्यापारलाई प्रवर्द्धन गर्ने विश्वास गरिएको छ। मेलाबाट संकलित आम्दानी सामाजिक कार्यहरूमा खर्च गरिनेछ, जसमा विपन्न विद्यार्थीहरूलाई छात्रवृत्ति वितरण तथा विभिन्न परोपकारी कार्यक्रमहरू सञ्चालन गरिने जानकारी दिए।

मेला भिमाद बजारको क्याम्पस रोड, बसपार्क चोक, लखन चोक, रत्न चोक, कुमार चोक, ठाडो लाइन, न्युरोड, पुरानो बजार क्षेत्रसम्म फैलिने क्लबका सचिव सुनिल श्रेष्ठले जानकारी दिए। यस्तै, मेलामा जुनसुकै जातीय समाज, विद्यालय, क्लबलगायत विभिन्न नागरिक समाजहरूले आफ्नो सांस्कृतिक भेषभूषा एवम् झाँकीसहित सहभागी हुन सक्ने उनले बताए।